စိုင်းတင်မြို့စား ဥက္ကာပျံ - ဝေသာ

ရခိုင်သမိုင်းမှာ ဥက္ကာပျံဆိုစွာ သင့်အောင်စိတ်ဝင်စားဖို့ ကောင်းရေ ပုဂ္ဂိုလ်တစ်ဦးပါ။ စွမ်းရည်သတ္တိ ပြည့်ဝရေ စစ်သားကြီးဖြစ်တေ။ အနုပညာကို စုံမက်မြတ်နိုးရေ စာပေပညာသျှင်ကြီးဖြစ်တေ။ မင်းခမောင်း၏ ရောင်း ရင်းကြီးလည်း ဖြစ်ပါရေ။ ဥက္ကာပျံ ထင်ရှားကျော်ကြားခရေ ကာလကတော့ခါ ၁၆ရာစုအဆုံး၊ ၁၇-ရာစု အစပိုင်း၊ ဘုရင်မင်းရာဇာကြီး (၁၅၉၃-၁၆၁၂)လက်ထက်မှာ ဖြစ်ပါရေ။

ဥက္ကာပျံငယ်စဉ်ဘ၀နန့် မိဘမည်ရည်ရို့ကို အတိအကျ မသိရပါ။ ဥက္ကာပျံရေ စိုင်းတင်မြို့စားအဖြစ် ခန့်အပ် ခံရပါရေ။ တချိန်တည်းမှာ အိမ်ရှေ့မင်းသားမင်းခမောင်း၏ အကြီးတော်အဖြစ်လည်းသွင့် မင်းတရားကြီးက ခန့်အပ်တာဝန်ပီးခပါရေ။

မင်းခမောင်းဆိုစွာက အရွယ်နန့်မမျှအောင် ကြမ်းကြုတ်ရိုင်းစိုင်းရေ မင်းသားဖြစ်ပါရေ။ ဥက္ကာပျံက သွန်သင် ဆုံးမ ပဲ့ပြင်စွာတိလည်း မင်းသားချေဘားမှာ နားဝင်ထိရောက်ခလီဖို့ မဟုတ်ပါ။ မင်းသားချေရေ အလဇ္ဇီထိုး၊ ဆပွတ်သတ်၊ ပြောခဲနက် ဆိုခဲနက်ဖြစ်နီပါရေ။ သူ့ကိုအလိုလိုက်လို့ အချစ်ကြီးချစ်တေ ခမည်းတော် မင်းကြီးကိုတောင်မှ အကျိုးနည်းအောင် ပြုမူခပါသိယင့်။

မင်းသားမှာ ဥက္ကာပျံအပြင် ဆလယာသတ်ဖက်အရာ ကိုးယောက်ဟိပါသိရေ။ စွမ်းရည်သတ္တိအရာမှာတော့ အားလုံးသူအပြည့်ပါဗျာယ်။ မင်းခမောင်းနန့် အေလူသန် တစ်ကျိတ်ရို့ရေ ချာလီမန်း (Charlemagne) နန်းတော်ထဲက သူရဲကောင်းဆယ့်နှစ်ယောက်ရို့ပိုင် အုပ်စုဖွဲ့ပနာ တသီးတခြားနီကတ်တေ။ ဇာအရေး ဇာကိစ္စပင်မဆို တွိမရှောင်၊ ဗိုလ်မထားကတ်တေလူတိပါ။ မင်းသားချေမှာတော့ခါ ဒေအပေါင်းအသင်းတိနန့် မခွဲမခွာပါဗျာယ်လေ။ ဒေအုပ်စု၏ ဦးဏှောက်နန့် ၀ိညာဉ်က အသူလေဆိုကေ ဥက္ကာပျံ။ ဥက္ကာပျံက စိတ်ဆွ ပီးလို့ ခမည်းတော်ကို လုပ်ကြံဖို့အတွက် လက်မရွံ့တစ်သိုက်ကို မင်းသားက စေလွှတ်ခပါရေ။ အရေးတော်ပေါက်ကြားလားခရေအတွက် မင်းသားနန့် သူ့လူဆယ်ယောက်စလုံး တိမ်းယှောင်ထွက်ပြီးပနာ ဟံသာဝတီမှာ ခိုလှုံခီကတ်ရပါရေ။ ဟံသာဝတီမှာ နီခကတ်တေ တစ်ချက်တစ်ပြက်အတွင်းမှာတောင် ဥက္ကာပျံရေ ပညာဥာဏ်ကြီးကျယ်နက်ရှိုင်းမှု၊ ကဗျာစွမ်း ရည်ထက်မြက်မှုရို့ကြောင့် ထင်ရှား၊ ကျော် ကြား၊ လေးစားခြင်း ခံခရပါရေ။ ““အသက်ကို ချမ်းသာပီးမေ””လို့ မင်းကြီးက ကတိပြုရေအတွက် မင်းခမောင်းနန့် သူ့အဖွဲ့ ရခိုင်ပြည်ကို ပြန်လာလတ်ကတ်တေ။ မင်းသားလည်း အယင်ရမြဲ အဆောင် အယောင်ကို ပြန်ရလို့ ခမည်းတော်မင်းကြီးကလည်းသွင့် ခမ်းခြောက်ခြင်းမဟိရေ မေတ္တာ တရားနန့် သားတော်ကို ချစ်ကြင်မြတ်နိုးလို့ ဟိနီခလီပါရေ။

အချိန်ကာလတိ ယင်းပိုင်နန့်ပင် ကုန်ဆုံးလာလတ်ပြီးကေ တစ်ခါမှာ ဟံသာဝတီကို ရခိုင်ရို့က ၀ိုင်းဝန်း ပိတ်ဆို့ကတ်ပါရေ။ အေပိုင်လုပ်ကြံနီရေအချိန်မှာ ဥက္ကာပျံက အရာတစ်ခါ သွီးထိုးပီးပြန်ရေအတွက် မင်းသားက ခမည်းတော်ကို လုပ်ကြံဖို့ ကြိုးစားပြန်ပါရေ။ အေတစ်ခါမှာလည်းသွင့် မင်းသားရို့ ရှုံးနိမ့်ပြန်ရေ အတွက် ရန်သူဘက်ကို ထွက်ပြီး ကတ်ရပြန်ပါရေ။ ဟံသာဝတီကတော့ခါ မင်းသားနန့် အပေါင်းပါရို့ကို ၀မ်းသာအားရ ကြိုဆိုလက်ခံပါရေ။ ယေဒါလည်းသွင့် ရန်သူဘားမှာ မြှောက်စားခံရစွာထက် ခမည်းတော် မင်းကြီးလက်ထဲမှာ သီဒဏ် အပီးခံရစွာက မြတ်ပါရေဘုရား””လို့ မိဖုရားတစ်ပါးက လျှောက်ထားချက်ကို မင်းသားနားဝင်ပါရေ။ နည်းအမျိုးမျိုးနန့် နှောင့်ယှက်ဟန့်တား ခံရကေလည်း မင်းသားနန့် နောက် လိုက်နောက်ပါရို့က အတားအဆီးအလုံးစုံကို ထိုးဖောက်ကျော်လွှားပနာ ပြည်တော်ပြန်လာလတ်ပါရေ။ မင်းသား၏သတ္တိ၊ ဗျတ္တိရို့ ထင်ရှားပေါ်လွင်ရေ အတွက်တာကြောင့် မင်းကြီးက အားလုံးကို ခြွင်းချက်မဟိ လွတ်ငြိမ်းခွင့်ပေးသနားလိုက်ပါရေ။

အရာတစ်ခေါက် ပြဿနာပေါ်စွာက သံတွဲမှာပါ။ သံတွဲမြို့ကို ဘုရားဖူးဖို့ မင်းသားထွက်တော်မူပါရေ။ သံတွဲကို ရောက်စွာနန့် ဥက္ကာပျံက အရာလှုံ့ဆော်ပြန်ပါဗျာယ်။ နှစ်ခါ ရှုံးနိမ့်ပြီးဗျာယ်၊ လုပ်ကြံဖို့ မကြိုး စားကေ့ဖိ။ ဒေတစ်ခါမှာ မင်းကြီးကို မကျေမနပ်ဖြစ်နီကတ်တေ သံတွဲသားတိကို စုစည်း၊ အတိအကျထောင် ထား ပုန်ကန်ဖိ၊ ဥက္ကာပျံက အေပိုင်အကြံပြုပါရေ။ ဘုရားကျွန် ထောင်ပေါင်းများစွာကို မင်းသားက စည်းရုံး သိမ်းသွင်းပါရေ။ စစ်အကျဉ်းသားတိလည်း ပါယင့်။ အေလူတိကို မင်းသားကိုယ်တိုင် ဦးစီးခေါင်းဆောင် ပနာ မြောက်ဦးမြို့တော်ကိုချီတက်ပါလတ်ကတ်တေ။ ဒေခေါက်ခါလည်း နေပြည်တော်
စစ်သည်ရို့က သူပုန်အင်အားစုတိကို အနိုင်ယူနှိမ်နင်း လိုက်ပြန်ပါရေ။ သူပုန်အများစုက မြန်မာဘက်ကို ထွက်ပြီး လားခကတ်တေ။ မင်းသားနန့် အပေါင်းအပါရို့ကို လက်ရဖမ်းမိရေ။ ဒေတစ်ခါမှာတော့ခါ ဘုရင်မင်းရာဇာကြီးက အမျက်ဒေါသပြင်းစွာဖြစ်ပါရေ။ သက်တော်ရှည် အမတ်ကြီးက ကြားဝင်တောင်းပန် လိုက်လို့ရာ၊ မဟုတ်ဆိုကေ သူပုန်ရို့အပြစ်ဒဏ် ပြင်းပြင်းထန်ထန် ခံကတ်ရပါဖို့။ မင်းကြီးရေ ယောနိသော မနသီကာရနန့် သက်သက်ညှာညှာအပြစ် ပီးပါရေ။ ယေဒါလည်း ဥက္ကာပျံခံစားရရေ အပြစ်ဒဏ်ကတော့ခါ သက်သာယင့်လို့ ပြောလို့မဖြစ်ပါ။

ဥက္ကာပျံဆိုစွာ နောင်တစ်ချိန်မှာ တိုင်းပြည်အုပ်ချုပ် မင်းလုပ်လာဖို့ အိမ်ရှေ့မင်းသားကို ဆုံးမပဲ့ပြင်ရဖို့ အကြီးတော်ဖြစ်တေ။ ဘုရင်မင်းမြတ်၏ ယုံမှတ်ခန့်အပ်ခံရရေ ပုဂ္ဂိုလ်ဖြစ်တေ။ အဂုက မင်းသားရေ နိုင်ငံတော်နန့် ပြည်သူလူထုကို အခါပေါင်းများစွာ သစ္စာဖောက်ဖျက်တေ။ အကြမ်း ဖက်နှောင့်ယှက်တေ။ အေချင့်ကို ဆင်ခြင်ကြည့်ုကေ ဥက္ကာပျံရေ မင်းကြီး၏ယုံမှတ်ကိုးစားမှုကို ပစ္စလက္ခတ် အလွဲသုံးစားလုပ်သူ ဖြစ်တေ။ ယင်းအတွက်ကြောင့် ဥက္ကာပျံရေ ကြီးမားလီလံသော တာဝန် ၀တ္တရားကြီးတိနန့် ထိုက်တန်သူမဟုတ်။ မဟာမုနိဘုရားမှာ ဘုရားကျွန်အဖြစ် ဥက္ကာပျံ ထမ်းရွက် လီ။ ပြစ်ဒဏ်ချမှတ်လိုက်ပါရေ။

နှစ်ကာလတိ အများကြီး ကျော်လွန်လာရေ ကာလတစ်ခုမှာ မင်းခမောင်း ရခိုင်ထီးနန်းမှာ မင်းဖြစ်လာပါရေ။ မင်းခမောင်း၏ ပထမဦးဆုံး လုပ်ဆောင်ချက်က သူ့ရောင်းရင်းကြီး ဥက္ကာပျံကို လူ့အသိုင်းအ၀ိုင်း ထဲပြန်ရောက်အောင် ခေါ်သွင်းစွာပါ။ ရခိုင်ရို့မှာ ကောင်းကောင်းကြီး ရှေးကျရေ အစဉ်အလာတစ်ခု ဟိပါရေ။ လူ့အသိုင်းအ၀ိုင်း အပြင်ဘက်တို့ နှင်ထုတ်ပစ်ခံထားရရေ ပုဂ္ဂိုလ်တစ်ဦးတစ်ယောက်ကို လူ့အသိုင်းအ၀ိုင်း ထဲ ပြန်ရောက်အောင်  ခေါ်ယူသွတ်သွင်းဖို့ဆိုကေ ခေါ်သွင်းဖို့ ပုဂ္ဂိုလ်စွာ မူလ အပြစ်ဒဏ်ချမှတ်ထားခရေ ပုဂ္ဂိုလ်ထက် ပိုလို့မြင့်မြတ်ရဖို့၊ ဘုန်းတန်ခိုးအာနုဘော် ပိုလို့ကြီးမြင့်ဖို့ လိုအပ်ပါရေ။ အဂု ဥက္ကာပျံအရေးမှာ မင်းခမောင်းစွာ ခမည်းတော်မင်းကြီးထက် ဘုန်းတန်ခိုးအာနုဘော် အရာမှာပိုလို့ ကြီးကျယ်မြင့်မြတ်တေလို့ မဆိုနိုင်ပါသိ။ အဓမ္မပြု ဆောင်ရွက်တေ ဆိုပြန်ကေလည်း အခိုင်အမာဟိပြီးသား ဓလေ့ထုံးစံတစ်ခုကို ကျူးလွန်ဖောက်ဖျက်ရာကျပါဖို့။ ဘိသိက်ခံရေ အခါက ပြု ထားရေသစ္စာကို ဖောက်ဖျက်ရာကျပါဖို့ဘုရား--စသည်ဖြင့် ဥက္ကာပျံက ယဉ်ယဉ်ကျေးကျေး သိမ်သိမ်မွေ့မွေ့ လျှောက်ထားငြင်းပယ်ပါရေ။

အကြိမ်ကြိမ်အလီလီ ဖျောင်းဖျပြောဆိုကေလည်း ဥက္ကာပျံက လက်မခံပါ။ ဥက္ကာပျံရေ ကြီးကျယ်မြင့်မြတ်မှု ကိုလည်း တွိ့ကြုံဖူးဗျာယ်။ ပျက်စီးဆုံးရှုံးမှုကိုလည်း တွိ့ကြုံဖူးဗျာယ်။ လောကဓံတရားနှစ်ပါး လုံးနန့် ကျွမ်းဝင်ဖူးဗျာယ်။ အေအကျိုးတစ်ရားနှစ်ရပ် ဖြစ်ပေါ်လာရခြင်းအကြောင်းက မိမိ၏လုပ်ရပ်ပင်ဖြစ်တေ။ အဂုပိုင် သိမ်ငယ်နိမ့်ကျနီရေ အဖြစ်ကနီပနာ ကိုယ့်လုပ်ရပ်အသီးသီးကို သုံးသပ်ဆင်ခြင်ကြည့်ချင်သိရေ။ အနိမ့် အမြင့် အတက်အကျပြွမ်းရေ မိမိဘ၀တာ၏ ကြွင်းကျန်ရေ အချိန်ကာလတိုကို တရားသဘောနန့် ရှုမှတ်ဆင်ခြင်ပနာ ဥက္ကာပျံ ကုန်ဆုံးကျော်လွန်လားလီပါရေ။

ဥက္ကာပျံရေ စာဆိုတော်ကြီးတစ်ဦးအဖြစ်နန့် သူ့ခေတ် သူ့ကာလ စာပေအနုပညာလောကကို ကဗျာလင်္ကာ တိနန့် ထုံမွှမ်းစီနိုင်ခပါရေ။ အပိုဒ် (၁၂)ပိုဒ်ပါဝင်ရေ ရတုတစ်ပိုဒ်ကို ဥက္ကာပျံစပ်ဆိုခပါရေ။ အေရတု (၁၂)ပိုဒ် စွာ တစ်နှစ်ကာလအတွင်းမှာဟိရေ တစ်ဆယ့်နှစ်ရာသီကို ကိုယ်စားပြုဖွဲ့ဆိုထားစွာပါ။ အေရတုမှာ ဥက္ကာပျံက ယင်းခေတ်ပြည်သူရို့ ကျင့်သုံးကတ်တေ ဓလေ့၊ ထုံးစံ၊ အပြုအမူရို့ကို သိမ်သိမ်မွေ့မွေ့နန့် အလှပလှချေတိကျ ပြတ်သားစွာ ဖော်ထုတ်စပ်ဆိုထားပါလီယင့်။ အိမ်ရှေ့မင်းခမောင်း ဟံသာဝတီမှာ သုံးနှစ်တာပျော်စံရေ အချိန်က ရခိုင်ပြည်ကို အတွက်တောင် မပေါ်နိုင်လောက်အောင် မိမိလျော့လျော့ ဟိနီခပါရေ။ ယင်းပိုင်ဖြစ်နီလို့ ဥက္ကာပျံက အေတစ်ဆယ့်နှစ်ရာသီရတုကို ဆက်သွင်းခစွာပါ။ အေရတု၏ အနုပညာစွမ်းအားကြောင့် မင်းခမောင်းစွာ ရခိုင်ပြည်ကို ပြန်လို့လွမ်းဆွတ်တမ်းတ အောက်မေ့မိလာရေ အတွက် ဟံသာဝတီက ချက်ချင်းပြန်လာလတ်ပါရေ။

တစ်ရပ်တစ်ရွာကို ရောက်လားပနာ အနီဝီးလားခရေ လူတစ်ဦးတစ်ယောက်ကို ကိုယ့်ရပ်ကိုယ့်ရွာပြန်ဖို့ အတွက်ပေါ် တမ်းတမိလာစီအောင်ဆိုရေ ရည်ရွယ်ချက်နန့် ရတုပို့ဓလေ့တစ်ခု ရခိုင်ပြည်သူရို့ကြားမှာ ဟိခဖူးပါရေ။

မြန်မာရို့လက်အောက်သို့ ကျလားခရေ အလားလားအပါးပါး ကာလတိမှာ ကိုယ့်ရိုးရာအစဉ်အလာ ထုံးတမ်းတိကို ရခိုင်သားရို့က တဆတ်ဆတ် စွန့်ခွာလာကတ်ပါရေ။ ယင်းအတွက်တာနန့် အေရတုပို့ ဓလေ့လည်းသွင့် အဂုဆိုကေ တစိလည်းမကျန် ကွယ်ပျောက်လားခပါဗျာယ်။ စစ်တကောင်းခရိုင်မှာကျခါ ကုမ္ပဏီ(အစိုးရ)က ကူညီထောက်ပံ့လို့ တည်ငြိမ်အေးချမ်းရေ လူ့အဖွဲ့အစည်းတစ်ခုကို ရခိုင်သားရို့ တည်ဆောက်ခကတ်တေ။ ယဉ်ကျေးမှုအစဉ်အလာတိကိုလည်းသွင့် ဆက်ပြီးကေ ထိန်းသိမ်းထားနိုင်ခ ကတ်ပါရေ။ စစ်တကောင်းသား ရခိုင်လူမျိုးတိ လည်ဖို့ပတ်ဖို့အတွက် ဖြစ်ဖြစ်၊ စီးပွားရေးကိစ္စအတွက်ဖြစ်ဖြစ် ရခိုင်ပြည်ကိုရောက်လာကတ်တေသူရို့မှာ အဂုသကပြောခရေ ရတုမျိုးတိ ပါလာကတ်ပါရေ။ စိတ်ဝင်စား ဖို့ကောင်းစွာတစ်ခုဟိပါရေ။ သူရို့အဂုနီထိုင်ကတ တေ စစ်တကောင်းဒေသမှာ ရတုစပ်ဆိုရေးသားခြင်း တစ်ခုတည်းနန့် လုပ်ကိုင်စားသောက်တေ လူတန်းစားတစ်ရပ် ဟိနီခြင်းပါ။

ယင်းဒေသက အိမ်ရှင်မရို့စွာ ဒင်္ဂါးတစ်ပြားအခပီးပနာ ကိုယ့်ကိစ္စနန့်ကိုက်ညီရေ ရတုတစ်ပုဒ်ကို ရီးစပ် ခိုင်းကတ်ပါရေလတ်။ ခရီးထွက်ဖို့ကန်နီရေ ကိုယ့်အိမ်သျှင်ကို ယင်းရတုကို ပီးလိုက်ပါရေလတ်။ လုပ်ငန်းကိုင်ငန်း အောင်မြင်ပြီးစီးရေခါ အေရတုကို ဖတ်ပါလီလို့ မှာလိုက်ကတ်တေလို့ ဆိုပါရေ။ ရပ်ဝီးကို ရောက်လားခရေ အိမ်သျှင်ယောက်ျားကလည်းသွင့် အချိန်ကျခါ ရတုကိုဖတ်ရှုခံစားပါဗျာယ်။ ဖတ်လိုက်စွာနန့် ကိုယ့်အိမ်၊ ကိုယ့်ယာ၊ ကိုယ့်မိသားစုရို့၏ အငွေ့အသက်တိကို ရတုက တဆင့် ခံစားရဟိလာကတ်ပါရေ။ ယေခါ ရင်ထဲနှလုံးသားထဲမှာ ချစ်ခြင်းမေတ္တာဓာတ်တိ ယိုစိမ့်လာပနာ အိမ်သျှင်ယောက်ျားလည်း ကိုယ့်မိသားစုဘားကို ဇာပိုင်အလျင်ရောက်နိုင်ဖို့လဲ၊ ပြန်လာကတ်ရစွာဗျာယ်လို့ ဆိုပါရေ။ တစ်ခါတစ်လီမှာတော့ခါ အဆင်မပြေလို့ အိမ်သျှင်ယောက်ျားလက်ထဲကို ရတုကဗျာလက်ရောက် ထည့်မပီးလိုက်နိုင်စွာမျိုးလည်း ဟိပါရေ။ အိမ်သျှင်ခရီးထွက်လို့ အင်တန်လောက် ကြာပြီးမှရာ ပီးပို့လိုက် ကတ်ရပါရေ။ ဇာပိုင်ပင်ဖြစ်ဖြစ်ပါ။ ရတုမြှားတံရို့ကတော့ခါ ရည်မှန်းချက်ပစ်မှတ်မှာ တစ်ဆံခြည်မလွဲ ဒက်ကနဲ လားစိုက်ကတ်စွာပါဗျာယ်။

ဝေသာ

ကိုးကား - San Shwe Bu: U Ga Pyan, The Governor of Sindin Arakan (J.B.R.S Vol.4, Part3 , 1919)ကို ဆီလျော်အောင် ပြန်ဆိုပါသည်။